Փաշինյանին փող է պետք․ Ամուլսարի գործով քրեական վարույթը կարճվել է

Հայաստանի գործող իշխանություններին՝ Նիկոլ Փաշինյանի գլխավորությամբ, փող է պետք, շատ փող։ Պատերազմից հետո իշխանությունները հանրությանը փորձում են մոլորեցնել «հաց և տեսարաններ» հռոմեական հին գաղափարով։ «Հացը», պատկերավոր ասած, չի բավականացնում, փոխարենը տեսարաններին են զոռ տվել։ Փաշինյանը, սակայն, հրաշալի հասկանում է, որ ջախջախված տնտեսությունը պետք է ինչ-որ կերպ ուշքի բերել, այլապես սոցիալական ցնցումներն անխուսափելի են դառնալու, և կարող են հանգեցնել իշխանության կորստի։

Այժմ փաշինյանական վարչախումբը, ոտուձեռ ընկած, գումար է փնտրում թե՛ դրսում, թե՛ ներսում՝ Հայաստանում։ Հայաստանի քննչական կոմիտեն հայտնել է, թե Ամուլսարի հանքավայրի շահագործման թույլտվության գործընթացում հնարավոր չարաշահումների վերաբերյալ քննվող քրգործը կարճվել է։ Ըստ ՔԿ հաղորդագրության՝ «Նախաքննության ընթացքում ձեռնարկվել են անհրաժեշտ և հնարավոր բոլոր քննչական ու դատավարական գործողությունները, սակայն ձեռք չեն բերվել փաստական տվյալներ առ այն, որ Ամուլսարի ոսկեբեր քվարցիտների հանքավայրի հանքարդյունահանման համալիրի աշխատանքային նախագծի՝ շրջակա միջավայրի վրա ազդեցության գնահատման հաշվետվություն կազմելիս, հաշվետվությունը փորձաքննության ենթարկելիս, հանքավայրի շահագործման թույլտվությունը տրամադրելիս կատարվել են հանցավոր արարքներ, ուստի 21.12.2021թ.-ին որոշում է կայացվել մի շարք անձանց նկատմամբ քրեական հետապնդում չիրականացնելու և գործով վարույթը կարճելու մասին»:

Արգիշտի Քյարամյանի ղեկավարած «դուքյանը», այլ որոշում չէր էլ կայացնելու։ Փաշինյանական վարչախմբի ներկայացուցիչները, եթե մինչև 2018 թվականը տասնյակ ու հարյուրավոր անգամ արտահայտվել են Ամուլսարի հանքի շահագործման դեմ, ապա իշխանափոխությունից հետո կտրուկ փոխել են իրենց դիրքորոշումը, մշտապես պնդել, թե հանքը պետք է շահագործվի։ Ընդ որում, Ամուլսարի հանքի շահագործումը նաև քաղաքական նշանակություն ունի, գերտերություններն էլ քանիցս նշել են հանքի շահագործման իրենց շահագրգռության մասին։ Միայն ժողովուրդը, և հատկապես Ջերմուկի բնակչությունն է դեմ, որ իրենք թունավորվեն, իսկ որոշ պաշտոնյաներ և միջազգային կորպորացիաներ հարստանան։ Այսօր արդեն հատ-հատ վերացվում են Ամուլսարի հանքի շահագործման խոչընդոտները։ Փաշինյանը այլևս կարիք չունի ժողովրդահաճո հայտարարություններ անելու, բնության սիրահար խաղալու։ Նրանց փող է պետք, հնարավորինս արագ և շատ, և այս իշխանությունն ամեն ինչ անելու է հանքը շահագործելու։ Արդյո՞ք բնապահպանները, հանրությունը, մասնագետները կպայքարեն իրենց իրավունքների և մարդկանց առողջության համար։ Հուսով ենք։

Կարեն Նահապետյան