Անդրանիկ Քոչարյանի վերաբերյալ «Հայաստան» դաշինքի պատգամավոր Վահե Հակոբյանի ներկայացրած հայցադիմումը իսկական գլխացավանք է դարձել դատավորների համար

Վահե Հակոբյանը նախորդ տարվա մայիսի 13-ին հայցադիմում է ներկայացրել Երևան քաղաքի ընդհանուր իրավասության դատարան ընդդեմ Անդրանիկ Քոչարյանի՝ վիրավորանք պարունակող արտահայտությունների համար հրապարակայնորեն ներողություն խնդրելու, զրպարտչական տեղեկությունները հրապարակայնորեն հերքել պարտավորեցնելու, հերքման գրառումը հայցվորի կողմից ներկայացված բովանդակությամբ սահմանելու, և ոչ նյութական վնասի գումարի բռնագանձման պահանջների մասին։

Հայցադիմումը նախ մակագրվել է դատավոր Աննա Փիլոսյանին, ով  վարույթ է ընդունել այն։

Դատական երկրորդ նիստին Քոչարյանի ներկայացուցիչը բացարկ հայտնելու միջնորդություն է ներկայացրել դատավոր Փիլոսյանին այն հիմնավորմամբ, որ վերջինս հանդիսանում է իրավապաշտպան Ռուբեն Մելիքյանի կինը, իսկ Մելիքյանն ունի ընդդիմադիր հայացքներ, ուստի նրա կինը  չի կարող անաչառ քննել գործը։ Բնականաբար, դատավորը մերժել է նման անհեթեթ հիմնավորմամբ միջնորդությունը։ Հետագայում դատական նիստերից մեկը չի կայացվել դատավորի մասնագիտական քննարկմանը մասնակցելու պատճառաբանությամբ, իսկ հաջորդ նշանակված նիստի օրը Փիլոսյանի լիազորությունները ԲԴԽ-ն արդեն դադարեցրեց։

Ընդդեմ Անդրանիկ Քոչարյանի հայցադիմումը մակագրվեց դատավոր Զարուհի Նախշքարյանին, ում լիազորություններն այսօր ևս դադարեցվեցին այն հիմնավորվամամբ, որ Նախշքարյանը դատապարտել է Աննա Փիլոսյանի լիազորությունները դադարեցնելու ԲԴԽ-ի որոշումը։

Ստացվում է, որ միայն թե ՔՊ-ական Անդրանիկ Քոչարյանի գործը վերջնակետին  չհասնի, և դատարանը ստիպված չլինի այդ գործով արձանագրել անհերքելի զրպարտության փաստը, դադարեցվում են լիազորությունները։

Աննա Ավետիսյան