Ընդդիմությունը քննարկում է միասնական թեկնածուով մասնակցելու հարցը

Խորհրդարանական «Հայաստան» դաշինքն այս պահին քննարկումներ, խորհրդակցութուններ է անցկացնում աշնանը Երևանի ավագանու ընտրություններին մասնակցելու համար, Ազգային ժողովում այդ մասին ասել է խմբակցության պատգամավոր Արթուր Խաչատրյանը։ Նրա խոսքով՝ ճիշտը համախմբվելն է, ցույց տալ, որ Երևանը համակարծիք չէ այն քաղաքականությանն, որ իրականացվում է իշխանությունների կողմից, թեև կա մտավախություն, որ կգործադրվի վարչական ռեսուրս։ «Վստահ եմ, որ պետք է համախմբվել ու միասնական թեկնածուով հանդես գալու հստակ ուղերձ հղել, Երևանի ընտրությունները չեմ կարծում, որ ուղղակի կենցաղային ընտրություններ են, Երևանը ՀՀ կենտրոնն է, քաղաքական կենտրոնն է, ամեն դեպքում քաղաքականացված ընտրություններ կլինեն»,- նշել է պատգամավորը։

Փաստացի խորհրդարանական ընդդիմությունը սկսում է գիտակցել միասնական թեկնածուով ընտրություններին մասնակցելու և իշխանությանը պարտության մատնելու անհրաժետության մասին։ Ինչպես բազմիցս նշել ենք «Քաղաքացիական պայմանագիրը» մտադիր է տասնյակից ավելի արբանյակ և փսեվդոընդդիմադիր կուսակցություններով մասնակցել ընտրություններին, փոշիացնել ընդդիմության ձայները։

Միայն այդ պարագայում հնարավորություն ունի հաղթանակ տանելու։ Մինչդեռ երեկ «Գելլափի» հրապարակած հարցումների համաձայն՝ «Քաղաքացիական պայմանագրի» թեկնածու, փոխքաղաքապետ Տիգրան Ավինյանն ունի ընդամենը 10,1%, լավագույն դեպքում այդքան էլ հնարավոր կլինի ստանալ վարչական ռեսուրսի, կրիմինալի և փողի չարաշահման պայմաններում, այսինքն ընդդիմությունն ունի բոլոր հնարավորությունները գործող իշխանություններին լուրջ պարտության մատնելու, իսկ Երևանում հաղթանակ տանելու դեպքում, շատ արագ հնարավորություն կստեղծվի ողջ երկրում իշխանափոխություն անելու։

Թերևս թե՛ «Հայաստան» դաշինքը, թե՛ մյուս իրական ընդդիմադիր քաղաքական ուժերը պարտավոր են իսկապես ջանքեր գործադրել, միավորվել մեկ, չվարկաբեկված և լուրջ քաղաքական ուժի շուրջ, իսկ լավագույն դեպքում միասնական ցուցակով մասնակցելու ընտրություններին։ Այդ դեպքում իրական հնարավորություն կլինի իշխանափոխությունը սկսել երկրում։

Արայիկ Համբարձումյան