Ադրբեջանը մկաններն է ցուցադրում
ՎԵՐԼՈՒԾՈՒԹՅՈՒՆՆԵՐ
Մի քանի օր շարունակ հայ-ադրբեջանական սահմանին և Արցախի շփման գծի երկայնքով ադրբեջանական զինուժի կուտակումներ են։ Ի վերջո, միայն այսօր Հայաստանի գործող իշխանությունները բարեհաճել են հայտարարել, որ իրենք տեղեկացված են։ Անվտանգության խորհրդի քարտուղար Արմեն Գրիգորյանն այսօր հավաքել է Հայաստանում հավատարմագրված դիվանագիտական ներկայացուցչությունների ղեկավարներին, հայտնել ադրբեջանական զորքերի կուտակումների մասին, ընդգծել միջազգային գործընկերների կողմից ջանքերի գործադրման կարևորությունը՝ Ադրբեջանի հնարավոր ագրեսիան կանխելու նպատակով։
Պաշտպանության նախարարությունում էլ ընդունել են մեր երկրում հավատարմագրված օտարերկրյա ռազմական կցորդներին, նարնց ևս տեղեկացրել են ադրբեջանական կուտակումների մասին։ Մի քանի օր շարունակ ադրբեջանական զինտեխնիկայի ակտիվ տեղաշարժի, նաև զորահավաքի կադրեր են տարածում, ընդ որում տեղեկատվական անվտանգության մասնագետների գնահատականով այդ կադրերը գրեթե միաժամանակ տարբեր աղբյուրներով են տարածվել բազմաթիվ օգտահաշիվներով, ինչը վկայում է, որ սա կազմակերպված և իրականացվող գործողություն է, ավելին՝ Արբեջանում չափազանց խիստ են վերաբերվում բանակի տեղաշարժերի վերաբերյալ տեղեկությունների արտահոսքին, նույնիսկ քրեական օրենսգրքով խիստ պատժի են արժանացնում, ուստի և հստակ կարելի է փաստել, որ Ադրբեջանը պետական քարոզչություն է իրականացնում՝ խուճապ տարածելով Հայաստանում և Արցախում։
Միայն երեկ Ադրբեջանի պետանվտանգության ծառայությունը բարեհաճել է ադրբեջանցիներին հորդորել չտարածել նման տեսանյութեր, երբ արդեն վաղուց հնարավոր բոլոր տեսանյութերը տարածվել էին նաև հայկական սեգմենտում։ Ադրբեջանի իշխանությունները 44-օրյա պատերազմից հետո՝ օգտվելով հայ հանրության մի հատվածի մեդիա անգրագիտությունից, ինչպես նաև գործող իշխանությունների անձեռնահասությունից և ապիկարությունից, իրենց ցանկացած նարատիվ և թեզ կարողանում են տարածել, խուճապի ենթարկել հայ հանրությանը։
Իհարկե ցանկացած պահի հնարավոր է, որ Ադրբեջանը նաև լայնածավալ կամ լոկալ մարտ սկսի, սակայն առաջին հերթին Ադրբեջանը դրանից առաջ մշակում և զոնդաժի է ենթարկում հանրությանը, իսկ մեր երկրում ո՛չ ազգային անվտանգություն կա, ո՛չ էլ համապատասխանաբար կոմպետենտ իշխանություն՝ ադրբեջանական քարոզչական հարձակումների դեմն առնելու համար։
Աշոտ Մխիթարյան
