Հաջորդ շաբաթ Ազգային ժողովում բավական թեժ է լինելու
ՎԵՐԼՈՒԾՈՒԹՅՈՒՆՆԵՐ
Հաջորդ շաբաթ Ազգային ժողովում բավական թեժ է լինելու։ Մեր տեղեկություններով՝ Նիկոլ Փաշինյանը նախօրեին հանդիպել է խմբակցության ղեկավարության հետ, հայտարարել, որ երկուշաբթի երեկոյան խմբակցության նիստ է գումարելու և տալու է բոլոր հանձնարարությունները, թե ինչպես պետք է վարվել։
Բանն այն է, որ հաջորդ շաբաթ արդեն Ազգային ժողովի օրակարգ է մտնում կարևորագույն հարցերից մեկը՝ Հռոմի ստատուտի վավերացումը, որն արդեն հասցրել է լիովին փչացնել հայ-ռուսական հարաբերությունները։ Ռուսաստանի իշխանության տարբեր ներկայացուցիչներ քննադատել են քաղաքական վեկտորի փոփոխության փորձ կատարող Հայաստանի վարչախմբին, իսկ Կրեմլի պաշտոնական ներկայացուցիչ Դմիտրի Պեսկովը Հռոմի ստատուտի վավերացման որոշումը բացահայտ թշնամական ակտ է անվանել։
Հռոմի ստատուտի դեմ հայտարարություններ են տարածել Ազգային ժողովի «Հայաստան» և «Պատիվ ունեմ» խմբակցութունները և չի բացառվում, որ ստատուտի քննարկումն Ազգային ժողովում վերածվի բավականին լուրջ բանավեճի, ընդհուպ բանը հասնի ձեռնամարտի։
Հատկապես այսօր, Արցախում ստեղծված իրավիճակով պայմանավորված և ընդդիմության նոր հանրահավաքային ալիքով պայմանավորված, ներքաղաքական իրավիճակը բավական սրվում է և Փաշինյանը հասկանում է, որ կարող է խնդիրներ ունենալ խորհրդարանում, անգամ սեփական խմբակցության ներսում։ 71 հոգանոց այդ խմբակցությունում ոչ բոլորն է, որ կիսում են Փաշինյանի դավաճանական մոտեցումները, սակայն առայժմ ստիպված են լծված մնալ Նիկոլի սայլին՝ խնդիրներ չունենալու համար, բայց հենց Նիկոլ Փաշինյանի իշխանությունը երերաց, իսկ ՔՊ-ականները հասկացան, որ այլևս շանս չեն ունենալու, նրանք միահամուռ կփախչեն «Քաղաքացիական պայմանագրից», նույնիսկ կհայտարարեն, թե իրենց սպառնալիքներով են պահել այդ խմբակցության կազմում։
Անահիտ Գասպարյան
