Ադրբեջանը վերականգնման ծրագիրը կտարածի նաև իր վերահսկողության տակ անցած գյուղերի վրա
ՔԱՂԱՔԱԿԱՆՈՒԹՅՈՒՆ
Ծրագիրը, որը վերաբերում է Ղարաբաղի և Արևելյան Զանգեզուրի վերականգնմանը, կարող է իրականացվել Հայաստանի հետ սահմանին գտնվող Ղազախի շրջանի չորս գյուղերում, որոնք անցել են Ադրբեջանի վերահսկողության տակ։ Նման կարծիք է tass.ru-ին հայտնել Ադրբեջանի Միլլի Մեջլիսի (Խորհրդարանի) միջազգային հարաբերությունների և միջխորհրդարանական հարաբերությունների հանձնաժողովի նախագահ Սամեդ Սեիդովը։
«Ես խորապես համոզված եմ, որ այն եզակի ծրագիրը, որը թույլ է տալիս վերակենդանացնել Ղարաբաղի տարածաշրջանը, իհարկե, կիրականացվի նաև այդ գյուղերում, և ինչպես ամբողջ Ղազախի շրջանը, նրանք ևս կդառնան գեղեցիկ, ծաղկուն»,- ասել է նա։
Սեիդովը վստահություն է հայտնել, որ տեղահանվածները, որոնցից շատերն այժմ ապրում են հանրակացարաններում, կվերադառնան այդ գյուղեր։ Նրա խոսքով, Ադրբեջանն արագ տեմպերով վերականգնողական ծրագրեր է իրականացնում։
Խորհրդարանական հանձնաժողովի ղեկավարը նաև նշել է, որ Հայաստանի հետ սահմանի սահմանազատման գործընթացը հաջողությամբ է զարգանում։
Մայիսի 24-ին Ադրբեջանի փոխվարչապետ Շահին Մուստաֆաևի ծառայությունը, որը ղեկավարում է Հայաստանի հետ պետական սահմանի սահմանազատման հանձնաժողովը, հայտնել է, որ ադրբեջանցի սահմանապահները վերահսկողության տակ են վերցրել Ղազախի շրջանի չորս գյուղերի՝ Բագանիս Էյրիմ, Աշաղի Ասկիպարա, Խեյրիմլի և Գըզըլգաջիլի տարածքները:
Միաժամանակ Ադրբեջանը Ղարաբաղում և Արևելյան Զանգեզուրում իրականացնում է «Մեծ վերադարձ» ծրագիրը, որի շրջանակներում, ըստ կառավարության, մինչև 2026 թվականի վերջ նախատեսվում է վերադարձնել 140 հազար մարդու։ Անցած ամառ Ադրբեջանի նախագահ Իլհամ Ալիևը նշել էր, որ Ղարաբաղի և Արևելյան Զանգեզուրի վերականգնման աշխատանքները, որոնց համար միլիարդավոր դոլարներ են հատկացվել, ավելի արագ են ընթանում, քան նախատեսված է։
Նյութը հրապարակման պատրաստեց Կամո Խաչիկյանը
