Բացառիկ կադրեր՝ Արսեն Աֆիյանի սպանության վայրից

Սևանի հանգստյան գոտիներից մեկում տեղի ունեցած սպանության վերաբերյալ Քննչական կոմիտեի օգոստոսի 1-ին հրապարակած տեսանյութը մոնտաժված է և հստակ չի երևում, թե ինչպես է կատարվում ավագանու անդամի սպանությունը։

Բավական չէ այն, որ Քննչական կոմիտեն տեսագրությունը հրապարակեց Սևանի ավագանու անդամի սպանությունից 15 օր անց միայն, տեսագրությունում նաև ամբողջությամբ չի երևում, թե ինչպես է տեղի ունենում վիճաբանությունն ու կատարվում սպանությունը։

Ավելին, Քննչական կոմիտեի հրապարակած տեսանյութում Սևանի ավագանու անդամին կրակելու պահին, քրեական հեղինակություն Նորատուսցի Արայի որդին՝ Լևոն Բանդուրյանը չի երևում, ինչը տեղիք է տալիս մտածել, որ իրավական համակարգը գուցե փորձում են ինչ-որ բան թաքցնել։

Oragir.News-ը կապ հաստատեց Քննչական կոմիտե, պարզաբանելու՝ ինչու՞ ամբողջությամբ չի հրապարակվել տեսագրությունը, ինչու՞ է այն մոնտաժված և ինչու՞ է հրապարակվել այն կադրերը, որոնցում հստակ չի երևում կատարվածը՝ մասնավորապես Լևոն Բանդուրյանի գործողությունները։

Քննչական կոմիտեից մեզ պատասխանեցին, որ հրապարակվել է այն տեսագրությունը, որտեղ հնարավորինս լավ է երևում տեղի ունեցած իրադարձությունները։

«Մոնտաժն արվել է, որ այդ երկարությունը կրճատվի։ Այսինքն մենք չէինք կարող օրինակ 10 րոպե տեսագրություն հրապարակել։
Տեսագրությունը դրված է քրեական գործում և երբ գործը կգնա դատարան՝ հետազոտվելու է։ Այսինքն այդտեղ որևէ բան թաքցնելու, որևէ բան խաբելու կամ չգիտեմ ինչի խնդիր չկա։ Մեր խնդիրն եղել է հանրությանը ներկայացնել, այն ինչ տեղի է ունեցել, մենք դա արել ենք նշված տեսագրության միջոցով»,-ասացին ՔԿ-ից։

Oragir.News-ի հարցին՝ այս պահին Նորատուսցի Արայի որդին՝ Լևոն Բանդուրյանը կալանավորվա՞ծ է, թե՞ ազատ է արձակվել, ՔԿ-ից պատասխանեցին․
«Նա կալանքի տակ է»։

Փաստացի՝ այս ամենից կարելի է ենթադրել, որ իրավական համակարգն ամեն կերպ փորձում է արդարացնել իշխանությունների հետ մտերիմ հարաբերությունների մեջ գտնվող քրեական հեղինակություն Նորատուսցի եղբայրներից Արա Բանդուրյանի որդու կատարածը, եթե դա նույնիսկ մարդկային կյանք արժե։

Հիշեցնենք՝ հուլիսի 17-ին, ժամը 22։00-ին Գեղարքունիքի մարզում՝ Երևան-Սևան ավտոճանապարհի Սևանի վարչական տարածքում գործող «Best Western Bohemian Resort» հանգստյան գոտում կրակոցներ էին հնչել։ Վիճաբանության մասնակիցներից մեկը Լևոն Բանդուրյանն է, ով քրեական պատմություններով հայտնի Արա Բանդուրյանի տղան է։

«Սևան» բժշկական կենտրոն էին տեղափոխվել Գեղարքունիքի մարզի բնակիչ 37-ամյա Արսեն Աֆիյանը, Կոտայքի մարզի բնակիչ 41-ամյա Էդգար Աֆյանը և Գեղարքունիքի մարզի բնակիչ 56-ամյա Աղասի Ալոյանը։ Ժամեր անց Արսեն Աֆիյանը, գիտակցության չգալով, մահացել է։
Նշենք նաև, որ սպանվածը Սևան համայնքի ավագանու անդամ էր և հայտնի ատամնաբույժ Սևան քաղաքում։