Երևանում 10 անչափահաս է բերման ենթարկվել․ հայտնաբերվել են դանակներ
ԻՐԱՎՈՒՆՔ
Հոկտեմբերի 2-ին վիճաբանության դեպք է տեղի ունեցել Երևանում։ Ժամը 14։40-ի սահմաններում ՀՀ ներքին գործերի նախարարության ոստիկանության Քանաքեռ-Զեյթունի բաժնում օպերատիվ տեղեկություններ են ստացվել, որ Թբիլիսյան խճուղու 3/14 հասցեում քոլեջի երեխաները իրար ծեծի են ենթարկում: Ինչպես հայտնում է ֆոտոլրագրող Գագիկ Շամշյանը, օպերատիվորեն նշված վայր է մեկնել ոստիկանության Քանաքեռ-Զեյթունի բաժնի օպերատիվ խումբը՝ քրեական հետախուզության բաժանմունքի օպերլիազոր Նիկողոսյանի գլխավորությամբ։
Ոստիկաններն ու պարեկները նշված հասցեից սառը զենք կրելու հիմնավոր կասկածանքով ձերբակալել և ոստիկանության Քանաքեռ-Զեյթունի բաժին են տեղափոխել թիվ 1 տարածաշրջանային քոլեջի ուսանողներ, Երևանի բնակիչ 16-ամյա Գ․ Ա․-ին և Կոտայքի մարզի բնակիչ 16-ամյա Ա․ Հ․-ին։ Ոստիկանության Քանաքեռ-Զեյթունի բաժին են ներկայացվել նաև Լոռու մարզի բնակիչ 16-ամյա Ն․ Դ․-ն, Կոտայքի մարզի բնակիչ 15-ամյա Ե․ Ս․-ն, Երևանի բնակիչ 17-ամյա Կ․ Ա․-ն, Կոտայքի մարզի բնակիչ 16-ամյա Ս․ Ա․-ն, Երևանի բնակիչ 16-ամյա Գ․ Խ․-ն, Երևանի բնակիչ 16-ամյա Մ․ Ա․-ն, Կոտայքի մարզի բնակիչ 16-ամյա Գ․ Հ․-ն և Երևանի բնակիչ 17-ամյա Է․ Ս․-ն: Արդեն ոստիկանությունում Գ. Ա․-ի անձնական խուզարկությամբ հայտնաբերվել է ծալովի դանակ, իսկ Ա.Հ․-ի անձնական խուզարկությամբ հայտնաբերվել է դանակ:
