Հնդկաստանը Հայաստանի համար պատրաստում է «Ապոկալիպսիս» հրթիռի նոր տարբերակը
ՔԱՂԱՔԱԿԱՆՈՒԹՅՈՒՆ
Ըստ Հնդկաստանի պաշտպանության նախարարության հետ առնչվող Indian Defense Research Wing վերլուծական ռեսուրսի Նյու Դելիի ղեկավարությունը ներկայումս քննարկում է Հայաստանին Pralay («Ապոկալիպսիս») օպերատիվ-մարտավարական հրթիռներ մատակարարելու հարցը, գրում է noi.md-ն։
Պայմանագիրը դեռևս կնքված չէ, սակայն Հնդկաստանի պաշտպանության նախարարությանը մոտ կանգնած աղբյուրները հայտնել են, որ կա այդ փաստաթուղթն արագ ստորագրելու և հրթիռներ մատակարարելու հնարավորություն։ Հիշեցնենք, որ առաջինն այս տարվա հուլիսին Indian Defence Research Wing հնդկական հրատարակությունն էր հայտնել, որ Հայաստանը հարցում է ուղարկել Pralay օպերատիվ-մարտավարական հրթիռների գնման համար՝ Ադրբեջանի կողմից Իսրայելից գնված LORA օպերատիվ-տակտիկական հրթիռների հետ հավասարակշռություն ստեղծելու նպատակով։ Միևնույն ժամանակ, հրապարակումը հիշեցրել էր Հնդկաստանի պարտավորությունները, այն է չարտահանել ավելի քան 300 կիլոմետր հեռահարությամբ և 500 կիլոգրամից ավելի մարտագլխիկով հրթիռներ: Իսկ դա նշանակում է, որ ներկա պայմաններում Pralay հրթիռների տեղափոխումը Հայաստան անհնար է։ Այդ իսկ պատճառով, ինչպես գրել է հրատարակությունը, Հնդկաստանն ակտիվորեն աշխատում է կրճատված հեռահարությամբ Pralay հրթիռներ ստեղծելու ուղղությամբ։
Հարկ է պարզաբանել, որ Հնդկաստանն ավարտել է Pralay պինդ վառելիքով աշխատող հրթիռների փորձարկումները դեռ 2023 թվականի նոյեմբերին, այնուհետև սկսել է դրանց զանգվածային արտադրությունը։ Այդ հրթիռի տեխնիկական առանձնահատկությունը նրա քվազիբալիստիկ հետագիծն է, որի շնորհիվ, երբ այն մոտենում է թիրախին մանևրում է և դառնում հակառակորդի հակահրթիռային պաշտպանության համար պոտենցիալ դժվար թիրախ։ Իր բնութագրերով այդ հնդկական հրթիռը մոտ է ռուսական «Իսկանդեր-Մ» քվազիբալիստիկ հրթիռներին, թեև ռուսական աղբյուրները պնդում են վերջիններիս գերազանցության մասին։ Հիշեցնենք նաև, որ հայկական բանակն ունի «Իսկանդեր-Մ» հրթիռներ, որոնք կիրառվել են 44-օրյա պատերազմի ավարտին Շուշիի գրոհների ժամանակ։ Հայտնի է նաև, որ Հայաստանը հետաքրքրություն է ցուցաբերել Հնդկաստանից BrahMos հիպերձայնային հրթիռներ ձեռք բերելու հարցում, որոնց հեռահարությունը մոտ 1000 կիլոմետր է, իսկ մարտագլխիկի քաշը մեկ տոննա։
Նյութը հրապարակման պատրաստեց Կամո Խաչիկյանը
