Ադրբեջանից ներգաղթյալներն Իսրայելում Իրանի համար հավաքել են ռազմական տվյալներ
ՄԻՋԱԶԳԱՅԻՆ
Իսրայելի իշխանությունները հայտնել են լրտեսական ցանցի հայտնաբերման մասին, որի անդամները վերջին երկու տարվա ընթացքում հարյուրավոր առաջադրանքներ են կատարել Իրանի հետախուզական ծառայությունների համար: Կրիպտոարժույթով վճարումները կատարվել են արտարժույթի փոխանակման կետերի միջոցով ամբողջ երկրում, իսկ կանխիկ գումարն Իսրայել է բերվել Ռուսաստանի Դաշնության քաղաքացիների կողմից, գրում է euronews.com-ը։
Անվտանգության գլխավոր ծառայությունը և Իսրայելի ոստիկանությունը բացահայտել են լրտեսական օղակ, որը բաղկացած էր իսրայելցի յոթ քաղաքացիներից, որոնք աշխատում էին իրանական հետախուզական գործակալություններում և հետախուզական տեղեկություններ էին հավաքում Իսրայելում Իսրայելի պաշտպանության բանակի բազաների և էներգետիկ ենթակառուցվածքների վերաբերյալ:
Ըստ իսրայելական լրատվամիջոցների բոլոր ձերբակալված կասկածյալները հայրենադարձներ են Ադրբեջանից, ովքեր ստացել են Իսրայելի քաղաքացիություն։ Իշխանությունները դա անվանում են «Իսրայելի պատմության մեջ անվտանգության ամենավատ խախտումներից մեկը»:
Պաշտոնական հաղորդագրության մեջ ասվում է, որ Հայֆայի և երկրի հյուսիսային շրջանների յոթ բնակիչներ աշխատել են իրանցի գործակալների մոտ և տարբեր առաջադրանքներ կատարել նրանց համար։ Ձերբակալված անդամների թվում են Ազիզ Նիսանովը, Ալեքսանդր Սեդիկովը, Վյաչեսլավ Գոշչինը, Եվգենի Յուֆան, Իգալ Նիսանը, նրանց թվում կան դասալիք զինծառայող, և երկու անչափահասներ, որոնց անունները չի հրապարակվել։
Հետաքննությունը պարզել է, որ ավելի քան երկու տարի կասկածյալներն իրանական հետախուզության երկու գործակալների ղեկավարությամբ մի շարք տարբեր առաքելություններ են իրականացրել Իրանի հետախուզական ծառայությունների համար։ Լրտեսական ցանցի անդամները հարյուրավոր հետախուզական առաքելություններ են իրականացրել Իսրայելի պաշտպանության բանակի բազաներում ամբողջ երկրում՝ կենտրոնանալով ռազմաօդային և ռազմածովային ուժերի բազաների, նավահանգիստների, Երկաթյա գմբեթների և էներգետիկ ենթակառուցվածքների վրա, ներառյալ Հադերայի էլեկտրակայանը: Հետաքննությունը նաև պարզել է, որ կասկածյալները տեղեկություններ են հավաքել Իսրայելի բարձրաստիճան պաշտոնյաների մասին։ Կասկածյալների գործունեությունը ներառել էր տարբեր օբյեկտների լուսանկարում և փաստաթղթավորում, որոնք լրտեսական ենթակառուցվածքի անդամները հանձնել էին իրանցի գործակալներին օգտագործելով ժամանակակից և հատուկ սարքավորումները, որոնք նրանք ձեռք էին բերել նախօրոք, նաև իրանական գործակալների ղեկավարությամբ:
Իսրայելական լրատվամիջոցները հայտնում են, որ կասկածյալներն ազգակցական կապեր ունեն, նրանցից երկուսը հայր և որդի են։ Կասկածյալներից ոմանք ծագումով հրեա են, իսկ մյուսներն Իսրայելի քաղաքացիություն են ստացել ընտանեկան կապերի միջոցով՝ Իսրայել վերադարձի օրենքի համաձայն:
Նյութը հրապարակման պատրաստեց Կամո Խաչիկյանը
