Հուսով եմ, որ համատեղ ջանքերով կամրապնդենք մեր հարաբերությունները․ Ալիևը շնորհավորել է Թրամփին

Ադրբեջանի նախագահ Իլհամ Ալիևը շնորհավորել է ԱՄՆ նորընտիր նախագահ Դոնալդ Թրամփին։ Այս մասին հայտնում է ԱՊԱ-ն՝ հղում անելով նախագահի մամուլի ծառայությանը։ Նամակում Իլհամ Ալիևը շնորհավորել է Դոնալդ Թրամփին նախագահական ընտրություններում տարած հաղթանակի կապակցությամբ։

Ալիևը նշել է, որ Թրամփի ջախջախիչ հաղթանակն արտացոլում է ամերիկացի ժողովրդի զգալի աջակցությունն ու վստահությունը, որն արտահայտվել է անձամբ Թրամփի և նրա քաղաքական կուրսի նկատմամբ։

Ալիևն ընդգծել է, որ Ադրբեջանը հատուկ նշանակություն է տալիս Ամերիկայի Միացյալ Նահանգների հետ հարաբերությունների համակողմանի զարգացմանը և հիշեցրել, որ իր առաջին նախագահական ժամկետում Թրամփը մեծ ուշադրություն է դարձրել Ադրբեջանի հետ բարեկամության և համագործակցության ամրապնդմանը։

Ալիևը նաև գոհունակություն է հայտնել Ադրբեջանի և ԱՄՆ-ի գործընկերության համար, որը կառուցված է փոխադարձ վստահության և աջակցության վրա՝ նշելով համատեղ ջանքերը այնպիսի կարևոր ոլորտներում, ինչպիսիք են գլոբալ մարտահրավերներին և ահաբեկչությանը հակազդելը, միջազգային խաղաղությունն ու անվտանգությունը և եվրոպական էներգետիկ անվտանգության ապահովումը։ Ալիևն ընդգծել է Դոնալդ Թրամփի շարունակական և ամուր աջակցությունը Ադրբեջանի էներգետիկ ռազմավարությանը։

Նախագահ Ալիևը նաև հայտարարել է, որ Ադրբեջանը կշարունակի ամրապնդել խաղաղությունն ու անվտանգությունը Հարավային Կովկասում և վստահություն է հայտնել, որ երկրները կշարունակեն համատեղ ջանքերը զարգացնելու բարեկամական հարաբերություններն ու գործընկերությունը՝ հիմնված ազգային շահերի վրա, ներառյալ ազգային անվտանգության ապահովումը։

Վերջում Ալիևը Թրամփին մաղթել է քաջառողջություն, երջանկություն և հաջողություններ իր կառավարության գործունեության մեջ՝ ի շահ ամերիկացի ժողովրդի։