Կուտակումներ՝ հայ-ադրբեջանական շփման գծում․ մանրամասներ
«Ամեն օր էլ կրակում են, երեկոյան ժամը 10-ից հետո սկսվում ա, շարունակվում մինչև լուսաբաց։ Օր կա, որ երկար են կրակում։ Ոնց որ հատուկ ժամեր ունեն կրակելու։ Հիմնականում անկանոն են կրակում, հետո մեզ են մեղադրում՝ հրադադարի ռեժիմը խախտելու մեջ»,- MediaHub-ի հետ զրույցում ասում է Սյունիքի մարզի Արավուս գյուղի բնակիչը։
Տեղ խոշորացված համայնքն ի տարբերություն Խոզնավարի, Խնածախի և Արավուսի՝ ադրբեջանական դիրքերից ավելի հեռու է գտնվում, սակայն, գյուղի տների մեծ մասը և շարժը դիտարկվում է։
«Մենք կրակոցները լսում ենք, դրանք լինում են ամեն օր։ Եթե ավելի պատկերավոր եք ուզում իմանալ սահմանային վիճակը՝ համեցեք Տեղ, իմ տան դռները բաց են։ Էնպես չի, որ գյուղում խուճապ կա, ուղղակի անհանգիստ ենք, որովհետև գոնե մենք տեսել ենք ու հիշում ենք Արցախի պատմությունը»,- ասում է Տեղի բնակիչը՝ նշելով, որ այժմ գյուղը արոտավայրերի ու ցանքատարածքների խնդիր ունի։
«Դե դիրքերն էնքան մոտ են, որ նրանց նշանառության տակ անասնապահությամբ զբաղվել հնարավոր չի։ Բացի էդ, հեկտարներով տարածքներ մնացել են անմշակ, որովհետև եթե հիշում եք, անցած տարի էս օրերին էլ էին կրակում, բայց ոչ այս անգամվա ինտենսիվությամբ»,- հավելեց նա։
Սյունիքից բացի, արդեն 2-րդ օրն է լարված է հայ-ադրբեջանական սահմանի Տավուշի ուղղությունը։ Ադրբեջանցիներն այս հատվածում ոչ միայն խախտել են հրադադարի պահպանման ռեժիմը, այլև, տավուշցիների հավաստամամբ, զենքի ու զորքի կուտակումներ կան։
«Հիմնական կուտակումները Չինարի, Մովսես, Ներքին Կարմիրաղբյուր գյուղերին մոտ գտնվող «Մեհրաբ»-ի դիրքերի ուղղությամբ են։ Իրենց կողմից կուտակումներ են, մեր կողմից համար 1։ Սահմանը դեռ էսքան լարված չէր եղել»,- MediaHub-ին փոխանցեց Բերդի բնակիչը։
Նրա տեղեկություններով, վերջին մեկ շաբաթվա ընթացքում գերլարված է նաև Վայոց ձորի Ջերմուկ քաղաքի դիրքերում։
