Նոր սպառնալիք Արցախի անվտանգությանը
ՎԵՐԼՈՒԾՈՒԹՅՈՒՆՆԵՐ
Արցախում վերջին մեկ ամսվա ընթացքում ստեղծված ծանր իրավիճակը այսօր հերթական բացասական հանգուցալուծմանը հանգեցրեց։ Արցախի տեղեկատվական շտաբը երեկ հայտնել է, որ ժամը 16:00-ի դրությամբ Ադրբեջանի զինված ուժերն Ասկերանի շրջանի Փառուխ գյուղի ուղղությամբ խախտել են շփման գիծը։ Անվտանգության նկատառումներից ելնելով՝ տարհանվել են Ասկերանի շրջանի Խրամորթ համայնքի կանայք և երեխաները, որոնց տեղափոխել են հարևան գյուղ։ Ադրբեջանցիները, կարելի է ասել, ամբողջությամբ գրավել են Փառուխ գյուղը և զգալի խորացել Արցախի տարածքում։ Արցախի իշխանությունները ընդամենը կարողացել են հայտարարել, թե Փառուխ և Խրամորթ բնակավայրերի ուղղությամբ շփման գծի պահպանությունը և այդ համայնքներում ապրող խաղաղ բնակչության անվտանգության ապահովումը գտնվում է Արցախում տեղակայված ռուսական խաղաղապահ զորամասի առաքելության տիրույթում։
Այն, որ օգտվելով ռուս-ուկրաինական պատերազմի ընձեռնած հնարավորություններից, Ադրբեջանն ու Թուրքիան ավելի են սաստկացնելու իրենց հարձակումները Հայաստանի և Արցախի դեմ, որևէ մեկի մոտ կասկած չէր հարուցում։ Ի վերջո հասկանալի էր, որ այդ երկու երկրները փորձում են օգտվել ստեղծված իրավիճակից, նաև Ռուսաստանի ռազմավարական դաշնակից Հայաստանին միջազգային ասպարեզում ներկայացնելու որպես Ռուսաստանի գործընկեր, լայնածավալ գործողություններ սկսել նաև այս ուղղությամբ։ Երկրորդ ճակատի բացումը լրջագույն հետևանքներ է ունենալու ոչ միայն Հայաստանի, այլ նաև իր՝ պատերազմում գտնվող ռազմավարական գործընկերոջ համար։ Իսկ ռուսական խաղաղապահ ուժերը Արցախում այս պահին չունեն համապատասխան մոտիվացիա և նաև ուժ՝ դիմակայելու թշնամու հարձակումներին։
Փաստացի, Հայաստանը կրկին կանգնած է լայնածավալ պատերազմ սկսելու վտանգի առջև և այս անգամ արդեն ֆիզիկապես և ունեցած ռեսուրսներով ի վիճակի չէ պաշտպանել ո՛չ իրեն, ո՛չ Արցախի բնակչությանը։ Խնդիրը պետք է ամեն գնով փորձել կարգավորել քաղաքական լուծումներով, իհարկե՝ պահպանելով այդ դեպքում թե՛ դեմքը, թե՛ տարածքները։ Հակառակորդն առաջիկայում, օգտվելով անպատժելիության իր ահագնացող խելահեղությունից, շարունակելու է նորանոր պահանջներ ներկայացնել Հայաստանին։ Իսկ Հայաստանի գործող իշխանությունները՝ վարչապետ Նիկոլ Փաշինյանի գլխավորությամբ, ընդամենը զբաղված են կառավարության նիստում հոխորտալով և Հայաստանի, Արցախի բնակչությանը որևէ կերպ տեր չկանգնելով։ Բնակչությունը մենակ է մնացել հակառակորդի դեմ, իսկ միջազգային իրավիճակը լիովին նպաստում է հակառակորդների լկտիացմանը։ Այն ինչ մենք տեսնում ենք Հայաստանում և Արցախում, առաջիկայում շատ ավելի լուրջ և ծանր դրսևորումներ է ունենալու։
Կորյուն Աբրահամյան
