Իլհամ Ալիևի ախորժակը գնալով աճում է. Սպառնալիքները շարունակվում են
ՎԵՐԼՈՒԾՈՒԹՅՈՒՆՆԵՐ
Նիկոլ Փաշինյանի 4 տակ ծալվելու և խեղճացած հայտարարությունների ֆոնին Ադրբեջանի նախագահ Իլհամ Ալիևի ախորժակը գնալով աճում է։
Երեկ Ալիևը նույնպես ասուլիս է տվել մի քանի պալատական լրատվամիջոցների և կրկին խոսել Զանգեզուրի միջանցքի մասին։ Ավելին, նա հայտարարել է, թե անախ Հայաստանի ցանկությունից Զանգեզուրի միջանցքը բացվելու է։ Ալիևի լպիրշությունը բավարարել է հայտարարելու, թե Զանգեզուրի միջանցք տերմինը նոյեմբերի 10-ի հայտարարության մեջ բացակայում , սակայն ինքն է այդ տերմինը մտցրել աշխարհքաղաքական լեքսիկոն։
Ալիևը նաև լրջագույն սպառնալիքներ է տվել Հայաստանին, հայտարարել, թե տեղյակ է, թե ովքեր են պատրաստվում Հայաստանին զենք առաքել, սակայն դա որևէ կերպ չի օգնելու Հայաստանին։ Նա նշել է, թե ակնկալում էր Հայաստանի հետ խաղաղության պայմանագիր ստորագրել 2022 թվականին, բայց դա տեղի չունեցավ, «Ինչի՞ է սպասում Հայաստանը, հավանաբար ինչ-որ աշխարհաքաղաքական փոփոխություններ, գուցե ինչ որ մեկը նրան ինչ-որ բան է խոստացել»,- ասել է Ալիևը, և նշել, թե խաղաղության պայմանագրի Ադրբեջանի առաջարկը որոշ ժամանակ դեռ սեղանին կլինի և Ադրբեջանի նախագահի խոսքով՝ «2023 թվականը Հայաստանի համար կլինի վերջին շանսը, իսկ 2025 թվականին կավարտվի Ռուսաստանի խաղաղապահ առաքելությունը»։
Ընդսմին Ադրբեջանի նախագահը պնդել է, թե Հայաստանը սահմանազատում չի ուզում, ինչը նշանակում է, որ սահմանն անցնելու է այնտեղ, որտեղ նշատակահարմար է համարում Ադրբեջանը։ Ալիևը նաև քննադատել է Եվրամիությանը առանց Բաքվի հետ համաձայնեցնելու Հայաստան քաղաքացիական նոր առաքելություն ուղարկելու համար, պնդել, թե պայմանավորվածությունը ձեռք էր բերվել 2 ամսով, սակայն այն ինչ որ պատճառով խախտվել է։
«Եթե ինչ որ բան ենք պայմանավորվել թեկուզ բանավոր, պետք է կատարենք»,- դժգոհել է Ալիևը և հայտարարել, թե՝ «Բանակցությունների համար որպես հարմար հարթակ է դիտարկում միայն Ռուսաստանն ու Միացյալ նահանգները, իսկ եվրամիությունը կարող է նման հարթակ լինել, եթե ազնիվ պահեր իրեն»։
Ըստ էության Ադրբեջանի նախագահի այս լպիրշացումը վկայում է, որ թշնամի պետությունը բացարձակապես որևէ կերպ շահագրգռված չէ խաղաղություն կնքելով և նոր ռազմական էսկալացիայի է գնում, որքան էլ Ադրբեջանի նախագահը փորձի հերքել այդ հանգամանքը։
Լիանա Ավագյան
