Փաշինյանը մտադիր է հետապնդել Արցախից Հայաստան տեղափոխված պաշտոնյաներին
ՎԵՐԼՈՒԾՈՒԹՅՈՒՆՆԵՐ
Վերջին տվյալներով, Արցախից Հայաստան է տեղահանվել 100.632 մարդ, որոնց մեծ մասին հաջողվել է ինչ-որ կերպ տեղավորել, լուծել նրանց սոցիալական նվազագույն կարիքները, ապահովել կացարանով և սննդով։
Իշխանությունները, փաստենք, միջազգային կառույցների և կամավորների օգնությամբ, բավական աշխատանք կատարել են այդ ուղղությամբ, այդկերպ որոշակիորեն մեղմելով ժամանած հազարավոր արցախցիների դժգոհության ալիքը։ Փաշինյանական վարչախումբը, սակայն, գիտակցում է, որ տեղահանված արցախցիներն առանձնապես խանդավառված չեն իր գործողություններով, և ինչ-որ պահի կարող են լուրջ վտանգ դառնալ իր իշխանության համար։
Ընդդիմադիր նոր ալիքը կանխելու, իր իշխանությանը սպառնացող վտանգները հեռացնելու համար նա մտադիր է շատ ուշադիր հետևել հատկապես Արցախից Հայաստան ժամանած պաշտոնյաներին ու զինվորականներին։
Զինվորականների մի մասին ներգրավելու են ՊՆ-ում, նշանակեն մարզերում, որ հեռու պահեն երևանյան գործընթացներից։ ՔՊ մեր աղբյուրների փոխանցմամբ, բարձրաստիճան զինվորականներին, քաղաքական գործիչներին ու պաշտոնյաներին էլ նախազգուշացնում են, որ կարող են խնդիրների բախվել օրենքի հետ։
Նախօրեին Արցախի նախագահ Սամվել Շահրամանյանն է խորհրդակցություն անցկացրել Արցախի ներկայացուցչության շենքում, քննարկել են իրենց հետագա անելիքները, Արցախից բռնի տեղահնվածներին աջակցելու եղանակները։ Այս հանդիպումը հարուցել է Նիկոլ Փաշինյանի բուռն զայրույթը, պատահական չէր, որ դրանից հետո սոցցանցերում արշավ սկսվեց Շահրամանյանի և Արցախի մյուս պաշտոնյաների դեմ, ընդհուպ հնչում էին նրանց ձերբակալելու կոչեր։
Փաշինյանի հրահանգով Պաշտպանության բանակի նախկին հրամանատար Սամվել Բաբայանն է հանդիպում պաշտոնյաների հետ, զգուշացնում, որ հայաստանյան ընդդիմության «խելքին ընկնելու» դեպքում լուրջ խնդիրների են բախվելու։ Այդ զգուշացումները, ի դեպ, առանձնապես լուրջ ազդեցություն չեն գործում։
Նարեկ Մարգարյան
