Դեմքի ամենաարդյունավետ 4 տնային դիմակները
ՖՈՏՈ
Չնայած խանութներում առկա դեմքի պատրաստի կոսմետիկ դիմակների բազմազանությանը՝ շատերը գերադասում են տնային դիմակները, քանի որ դրանք գնվածներից շատ ավելի արդյունավետ են, և քանի որ պատրաստում եք սեփական ձեռքերով, իմանում եք՝ ինչ եք քսում Ձեր դեմքին, քանի որ ինքներդ եք ընտրել և խառնել բաղադրիչները: Հոդվածը գրելիս օգտվել ենք տարբեր աղբյուրներից:
Ներկայացնում ենք դեմքի ամենաարդյունավետ 4 տնային դիմակները՝
Դիմակ-լիֆթինգ ձվի սպիտակուցով (նորմալ և յուղոտ մաշկի համար)
Պատրաստման եղանակն ու կիրառումը
- 2 ձվի սպիտակուցներն առանձնացնել, լցնել տարայի մեջ, հարել մինչև փրփրեն,
- Հարած սպիտակուցներին ավելացնել նորմալ մաշկի համար 3, իսկ յուղոտի համար՝ 5 կաթիլ կիտրոնի հյութ,
- Ստացված զանգվածին ավելացնել 1 ճ.գ. ամբողջական հացահատիկի ալյուր,
- Պատրաստ դիմակը քսել դեմքին՝ խուսափելով աչքերի հատվածից և շրթունքներից, 20 րոպե պահել,
- Լվանալ սենյակային ջերմաստիճանի ջրով:
Ուշադրությու՛ն – Չորանալիս դիմակը ձգում է մաշկը: Այն գիպսի նման ամուր կպչում է դեմքին, ուստի մաքրելու համար անհրաժեշտ կլինի դեմքը լվանալ մի քանի անգամ:
Խմորիչով դիմակ (ակնեի դեմ)
Խմորիչով դիմակներն օգտակար են մաշկի համար, հատկապես՝ ակնեի, մաշկի չորության և ջրազրկման, առաձգականության նվազման, ինչպես նաև տուրգորի առկայության դեպքում:
Պատրաստման եղանակն ու կիրառումը՝
- 1 ձվի սպիտակուցը հարել,
- Ավելացնել 10 գ. խմորիչ և 1 թ.գ. ջրածնի պերօքսիդ, խառնել,
- Զանգվածը քսել դեմքին,
- 10 րոպե հետո տաք ջրով լվանալ:
Խոնավացնող և հանգստացնող դիմակ ալոեով (հալվեով)
Ալոեով դիմակը ձգում և խոնավեցնում է մաշկը, վերացնում դեմքի կարմրությունները: Դիմակը պարբերաբար օգտագործելու դեպքում արյունատար անոթների պատերն ամրանում են, և կուպերոզը (անոթային հիվանդություն, որի ժամանակ արյան անոթների պատերը նոսրանում են) վերանում է:
Պատրաստման եղանակն ու կիրառումը՝
- 1 ճ.գ. ալոեի հյութը 1 ճ.գ. մեղրի հետ խառնել,
- Զանգվածը քսել դեմքի մաքրված մաշկին (ցանկության դեպքում՝ նաև պարանոցին և դեկոլտեին),
- 10-15 րոպե թողնել,
- Լվանալ սկզբում տաք, հետո սառը ջրով:
Վարսակով դիմակ ծակոտիների նեղացման համար
Վարսակի փաթիլներով և կավով դեմքի դիմակը խորապես մաքրում և փոքրացնում է ծակոտիները: Մաշկը դառնում է հարթ, իսկ դեմքի գույնը՝ թարմ և պայծառ: Դիմակը վերացնում է բորբոքումները և նպաստում մաշկի արագ ապաքինմանը:
Պատրաստման եղանակն ու կիրառումը՝
- 1 ճ.գ. մանրացրած վարսակի փաթիլների վրա լցնել 60-75 մլ տաք ջուր, և թողնել, որ փքվեն,
- Ավելացնել 1 ճ. գ. կապույտ կավ, խառնել մինչև զանգվածը դառնա միատարր,
- Դիմակը քսել դեմքին և սպասել մինչև չորանա,
- Լվանալ տաք ջրով,
- Մաշկի տեսակին համապատասխան խոնավացնող կրեմ քսել:
Նյութը հրապարակման պատրաստեց Լիլիթ Ամիրաղյանը:
