Կարծիք. Մոսկվա կատարած Փաշինյանի հետընտրական այցը «լավ նշան» է
ՎԵՐԼՈՒԾՈՒԹՅՈՒՆՆԵՐ
eadaily.com-ը գրում է, որ Ռուսաստանի Դաշնային Խորհրդի միջազգային գործերի կոմիտեի նախագահի տեղակալ Վլադիմիր Ջաբարովը «լավ նշան» է համարել հունիսի 20-ին կայացած խորհրդարանական ընտրություններում «Քաղաքացիական պայմանագիր» կուսակցության հաղթանակից հետո Հայաստանի վարչապետի պաշտոնակատար Նիկոլ Փաշինյանի այցը Մոսկվա: Նրա խոսքով շատ կարևոր է, որ ընտրություններից հետո Նիկոլ Փաշինյանն իր առաջին այցը կատարել է հենց Ռուսաստանի մայրաքաղաք: Հայաստանի ղեկավարությունը հասկանում է, թե որքան կարևոր է Ռուսաստանի հետ համագործակցությունը տարածաշրջանում անվտանգության հարցերում և Լեռնային Ղարաբաղի շուրջ ստեղծված իրավիճակում:
Քաղաքական մեկնաբան Արմեն Գասպարյանն էլ իր հերթին կարծում է, որ Փաշինյանի այցը մեկ անգամ ևս ցույց է տալիս, որ արդարացված չէին այն հույսերը, որ ԱՄՆ-ը, Ֆրանսիան կամ այլ արևմտյան տերություն կօգնեն Հայաստանին հաղթահարել մարտահրավերները: «Մեր աչքի առաջ վերափոխում է տեղի ունեցել: Քաղաքական գործիչը (Նիկոլ Փաշինյան), որը տրամագծորեն այլ հայացքներով է անցել իշխանության բախվել է բոլորովին այլ իրականության: Մի բան է, երբ խորհրդարանում ընդդիմություն ես, կարող ես քննադատել ցանկացածին ու ինչ որ բան ասել, բայց բոլորովին այլ է, երբ դու վարչապետ ես», - հայտարարել է Գասպարյանը:
Նա հիշեցրել է նաև, որ նախորդ շաբաթ Մոսկվայում էր գտնվում ՀՀ ՊՆ պատվիրակությունը, որը քննարկել է 102-րդ ռուսական բազայի ստորաբաժանումների կողմից հանրապետության սահմանային տարածքներում անվտանգության ամրապնդման, ինչպես նաև Մոսկվայի միջնորդությամբ համատեղ հայ-ադրբեջանական սահմանազատման և գծանշման հանձնաժողովի ստեղծման հարցը:
Նյութը հրապարակման պատրաստեց Կամո Խաչիկյանը
