«Լուսավոր Հայաստանը» ակտիվորեն պատրաստվում է ՏԻՄ ընտրություններին

Առաջիկայում Հայաստանում կայանալու են ՏԻՄ ընտրությունները, որոնք լուրջ մարտահրավեր են քաղաքական ուժերի համար։ Թե՛ խորհրդարանում հայտնված ուժերը, թե՛ արտախորհրդարանական ուժերը հնարավորություն կունենան ստուգելու իրենց ուժերն ու հնարավորությունները տեղական ինքնակառավարման մարմինների ընտրություններում։ ԱԺ արտահերթ ընտրություններից հետո երկրում բոլորովին այլ իրավիճակ է ստեղծվել, քաղաքական շատ ուժեր կորցրել են իրենց ընտրազանգվածը, խորհրդարան են անցել երկու այլ ընդդիմադիր ուժեր։ Այդուհանդերձ, քաղաքական ուժի կարևորագույն հատկություններից մեկը ժողովրդից չնեղանալն է։

«Լուսավոր Հայաստան» կուսակցությունը 8-րդ գումարման խորհրդարանում չհայտնվեց, թեև նախորդ գումարման ԱԺ ակտիվ ընդդիմադիր խմբակցություններից մեկն էր։ Այժմ էլ Էդմոն Մարուքյանի ղեկավարած ուժը որոշել է ակտիվորեն մասնակցել ՏԻՄ ընտրություններին, ընդ որում՝ մի շարք կարևոր համայնքներում բավական լուրջ մասնակցություն է ունենալու։ ԶԼՄ-ների տեղեկություններով, Գյումրիում, օրինակ, ԼՀԿ ցուցակը կգլխավորի Սարիկ Մինասյանը, որը 7-րդ գումարման խորհրդարանում ԼՀԿ խմբակցության պատգամավոր էր։ Վանաձորում ընտրությունը գնալու է Էդմոն Մարուքյանի եղբոր՝ Քրիստ Մարուքյանի, և նախկին պատգամավոր Հրանտ Այվազյանի թեկնածությունների շուրջ իսկ Հրազդանում էլ կառաջադրեն Արշավիր Խաչատրյանին, ով ԼՀԿ Կոտայքի տարածքային կառույցի ղեկավարն է:

Մեր տեղեկություններով, քննարկվում են այլ համայնքներում ևս ակտիվ մասնակցություն ունենալու հարցերը։ Քաղաքական ուժը իրավունք չունի նեղանալ իր ժողովրդից, և իմաստուն որոշում է, որ խորհրդարանական ակտիվ շրջափուլ անցած ուժը մասնակցում է ՏԻՄ ընտրություններին, նաև ամրապնդում է իր մարզավիճակը առաջիկա քաղաքական գործընթացներին մասնակցելու իրավունք ունենալու համար։

Կարեն Արշակյան