Պոռոտախոս և գլուխգովան․ ՊՆ նախարարի իրարամերժ հայտարարությունները

2018թ․ իշխանափոխությւոնից հետո Հայաստանի պաշտպանության նախարարի պաշտոնը զբաղեցնող անձինք իսկական աղետ են դարձել երկրի և զինված ուժերի համար։ Մի նախարարը հայտարարում էր «Նոր պատերազմ, նոր տարածքներ», իսկ այժմ իզութոզով անհետացել է։ Երկրորդն ընդհանրապես ոչինչ չէր հայտարարում և այդպես անփառունակ էր հեռացվեց պաշտոնից։ Իսկ երրորդը տակավին օգոստոսի 7-ին խստորեն հրահանգել էր կասեցնել Հայաստանի սահմանը հատելու` հակառակորդի բոլոր փորձերը: Երրորդ զորամիավորման ղեկավար կազմին և ենթակա ստորաբաժանումներին ներկայացնելով զորամիավորման հրամանատար, գնդապետ Ալեքսանդր Ցականյանին՝ Կարապետյանը մասնավորապես հայտարարել էր. - «Հակառակորդը ոչ մի ձև չպետք է նույնիսկ մտածի ներթափանցել մեր տարածք, դա ձեր խնդիրն է: Դրա համար, կորպուսի հրամանատարը և զորամասի հրամանատարները, ստորաբաժանումների հրամանատարները՝ սկսած դիրքի հրամանատարից, ունեն բոլոր իրավունքները՝ կիրառել բոլոր միջոցները մեր սահմանները պաշտպանելու նպատակով: Միևնույն ժամանակ, մենք ոչ մի ձև չենք ուզում ոչ մի ուղղության վրա սրացումներ, բայց եթե փորձեցին ներթափանցել մեր տարածք, ես բոլորիդ հրամայում եմ՝ կիրառել բոլոր միջոցները, որ այդ միտումները հաջողության չհասնեն»:

Հակառակորդը ոչ միայն մտածել, այլև արդեն երրորդ օրն է՝ կտրել է Սյունիք տանող ճանապարհը, մի քանի տասնյակ զինվորականներով փակել Գորիս-Կապան ավտոճանապարհի երկու հատվածները ու համառորեն հրաժարվում է բացել։ Պաշտպանության նախարար Արշակ Կարապետյանի ձայնն էլ այս ընթացքում չի լսվել։ Նրա հրամանն էլ, կարծես, առանձնապես բանի տեղ դնող չկա։ Իսկ այդ ընթացքում Հայաստանը շարունակում է կտոր-կտոր կորցնել իր ինքնիշխանությունը։

Գոռ Մանուկյան