Ընդդիմությունը բացահայտում է Փաշինյանի սուտը

ՀՅԴ ԳՄ անդամ, «Հայաստան» խմբակցության պատգամավոր Իշխան Սաղաթելյանը, ինչպես և խոստացել էր, ֆեյսբուքյան էջում տեսանյութ է հրապարակել, որում բացահայտել է պատերազմի վերաբերյալ Նիկոլ Փաշինյանի ստերը։ Սաղաթելյանը նշել է, թե պատերազմի օրերին ՀՅԴ ներկայացուցիչների հետ երկու փակ հանդիպում է ունեցել Նիկոլ Փաշինյանի հետ։ Եվս երկու անգամ էլ նա հանդիպել է արտախորհրդարանական ուժերի կազմում։ ՀՅԴ ներկայացուցչի փոխանցմամբ՝ հոկտեմբերի 12-ին արտախորհրդարանական ուժերի հետ հանդիպման ժամանակ Փաշինյանը ներկայացրել է, որ ունենք կորուստներ, կորցրել ենք Թալիշը, Մատաղիսը և մարտեր են ընթանում Հադրութի մոտակայքում:

«Ես իրեն ընդհատեցի և ասեցի, որ Հադրութը հանձնված է, նա ինձ հակաճառեց, թե որտեղից այդ տեղեկությունը, ես ասել եմ, որ այդ տեղեկությունը հստակ է: Մոտ կես ժամ անց նա իրեն բերված մի զեկույց կարդաց, որ իբր Հադրութում մարտեր են ընթանում: Այդ հանդիպման ժամանակ ես ասել եմ, որ եթե հաղթենք, բոլոր դափնիները քոնն են, բայց եթե պարտվենք միակ մեղավորը դու ես: Նաև այդ հանդիպման ժամանակ բարձրաձայնվել է զոհերի իրական թիվը, որը տարբեր էր հայտարարված թվից»,- պատմել է Սաղաթելյանը:

Սաղաթելյանի խոսքով` հաջորդ հանդիպումը տեղի է ունեցել հոկտեմբերի 19-ին, որի ժամանակ Փաշինյանը ասել է. «Ես ունեմ առաջարկ պատերազմը կանգնեցնելու և դրա գինը հետևյալն է` 5+2 շրջան հանձնելով հնարավոր է պատերազմը կանգնեցնել, ու շարունակեց, որ այլ ելք չկա, հնարավոր չէ ռազմաճակատում բեկում մտցնել, ես հարցրեցի` գոնե կարգավիճակի հարց կա, ինքը ասաց, որ չէ, չկա: Ես ասել եմ, որ դու փաստորեն 23 օր «հաղթելու եմ» ասելուց հետո գնում ես ստորագրես կապիտուլյացիայի փաստաթուղթ և երկիրը կանգնեցրել ես աղետի առաջ»:

ՀՅԴ ներկայացուցչի այս բացահայտումներից հետո կարելի է հստակ արձանագրել, որ Նիկոլ Փաշինյանն ի սկզբանե Հայաստանի Հանրապետությունը տարել է պարտության, ժողովրդից թաքցրել իրական վիճակը, խաբել կորուստների մասին, և հետո էլ փորձել է պատասխանատվությունը բարդել քաղաքական ուժերի վրա։ Մինչդեռ պարտության միակ մեղավորն ու պատասխանատուն հենց ինքն է, որ կա։ 

Արմեն Մաթևոսյան