Մեկ օրով ապրող իշխանությունն ապագա չունի

44-օրյա պատերազմում կրած պարտությունից հետո իշխող ուժը՝ Նիկոլ Փաշինյանի գլխավորությամբ, լկտիաբար խոստումներ էր տալիս՝ վերականգնել պատերազմի և համավարակի պատճառով տուժած տնտեսությունը, բանակի մարտունակությունը, լուրջ բարեփոխումներ իրականացնել տարբեր ոլորտներում։

Մեկ տարի անց անվրեպ կարելի է արձանագրել՝ իշխանության տված և ոչ մի խոստում իրականություն չի դարձել։ Երկնիշ տնտեսական աճի խոստումներին զուգահեռ միջազգային կազմակերպություններն ընդամենը 6,5 տոկոս ՀՆԱ աճ են կանխատեսում 2021 թվականի համար, ինչը, իհարկե, բավարար չէ, հատկապես հաշվի առնելով գնաճը։ Բացարձակապես որևէ քայլ չի արվել բանակում բարեփոխումներ իրականացնելու ուղղությամբ։ Թերևս, միայն բարձրաստիճան զինվորականների համազգեստի գույնն է փոխվել։

Զինված ուժերը գտնվում են նույնպիսի ջլատված վիճակում, ինչ պատերազմի ժամանակ, իսկ քաղաքական իշխանությունը խոչընդոտում է ԶՈՒ բարեփոխումներին։ Առաջին բանը, որ պիտի աներ իշխանությունը պատերազմից հետո, տարբեր ոլորտներում վերականգնման հայեցակարգեր ներկայացնելն էր։ Ըստ էության, Նիկոլ Փաշինյանի իշխանությունը չունի տեսլական որևէ ուղղությամբ։ Նրա միակ բանուգործը իշխանության ղեկին հնարավորինս երկար մնալն է, ընդդիմախոսներին պատժելն ու իրենց անձնական անվտանգությունն ապահովելն է։ Նման իշխանությունը Հաաստանում ապագա ունենալ չի կարող։ Նման իշխանությամբ Հայաստանն ինքը ապագա չունի։ Որքան շուտ հայ հանրությունը հասկանա այս փաստը, այնքան չեն կորսվի ուշքի գալու հնարավորությունները։

Հայկ Այվազյան